Act 14 | PONPDN | STEP | A IET me wiauier nan Ikonien: Ira karos kotilon on nan sinakoke en Sus oko, ap padapadak kelail, lao kisan men Sus o Krik toto posonla.

Acts 14

1 A IET me wiauier nan Ikonien: Ira karos kotilon on nan sinakoke en Sus oko, ap padapadak kelail, lao kisan men Sus o Krik toto posonla. 2 A Sus oko, me so poson, kamokimokid men liki kai o kalolap irail on saulan kan. 3 A ira mimieta warai wasa o, o aima padapadak duen kupur en Kaun o, me kotin kapwaiada masan kupur a, ni a kotin kasaleda kilel o manaman akan ki lim ara. 4 A toun kanim liak toror pasan. Akai me ian Sus oko, a akai ian wanporon akan. 5 A moromoron lao wiauier san ren men liki kan o pil Sus oko ianaki ar saumas akan, pwen kame o kate ira, 6 Ira lao manier, ap pitilan kanim Likaonien, o Listra, o derpe, o sap me mi imp a, 7 Wasa o ira padapadak ronamau. 8 A ol amen momod Listra, me pat en na luet o kokon danidan san ni a tikitik, me saikenta alu. 9 I me kin roneron en Paulus a padak. A lao masani i, ap kotin kasauiada, me a poson itar on en kakelailada, 10 Ap kotin kapitie laudeda masani: Ukida na om! I ari liuisinkadar o aluwei. 11 Aramas lao kilaner, me Paulus kotin wiadar, rap nilada kapitiki nin lokaia en Liakonien: Kot akan wia aramasala ap kot i don kitail. 12 Irail ari ki on mar en Parnapas lupiter, a Paulus Merkurius, pweki a kaunda kaparok. 13 A samero en lupiter, me kin mi mon kanim o, ap wado kau ol o al en tuka kai mon kanim o, ap men ian pokon o wia mairon isis. 14 A wanporon oko Parnapas i Paulus lao mani mepukat, ira ap ter pasan ara likau o tan won nan pun en aramas akan likelikwir: 15 Main ko, da me komail wiawiaki mepukat? Kit aramas dueta komail, ap padaki on komail, pwe komail en wuki san kot mal pukat, wuki on Kot ieias, me kotin kapikadar lan, o sappa, o sed, o audepa ’rail karos. 16 Me kotin mueid on toun sap karos en wia pein insen ar mas o. 17 Ari so, a sota kotin okila pein i, pwe a kotin wiawia mau o kotiki on komail katau san nanlan o rak o, o kadireki nan monion omail mana o peren. 18 Ira kotin masani mepukat, a ekis ta, ira sota kak katukiedi en pokon o ar pan mairon on ira. 19 A Sus oko ap kodo san Antiokien o Ikonien, kamakarada aramas. Ir ari kate Paulus o uradokilan likin kanim o, re ap kiki on, me a matalar. 20 A ni en tounpadak kan ar kapil pena i, a kotida ap kolon on nan kanim o, a manda a ian Parnapas koieila Derpe. 21 Ira lao padapadak ronamau nan kanim o, o kasaulanaiar me toto, ira ap purela Listra, o Ikonien, o Antiokien. 22 Ira kakelada nen en tounpadak kan o panaui irail, me ren dadaurata poson, o me kitail en leleki wein Kot kamekam toto. 23 Ira lao kasapwilada saunkoa kai nan momodisou karos, ap kapakap o kaisesol, ap kapakapa ki irail ren Kaun o me re posonlar. 24 Ira kakan sili Pisidien ap lel on Pampilien. 25 Ira lao padaki duen masan o nan Perke, ap kotilan Atalien. 26 A san ni wasa o ira tanalan Antiokien, wasa ira sapwile kidar mak en Kot on dodok o me ira kapwaiadar. 27 Ira lao pwarador, ap kapokon pena momodisou, rap kotin kasoia on irail duen en Kot a kotin wiaki ira, o duen a kotin ritinada wanim en poson en men liki kan. 28 Ira ap kotikot warai ren tounpadak kan.